Til sambandsaðila ÍSÍ
Reykjavík, 21. desember 2021
Sæl öll,
Með pósti þessum viljum við tilkynna ykkur að Andri Stefánsson hefur verið ráðinn framkvæmdastjóri Íþrótta- og Ólympíusambands Íslands.
Andri tekur við starfinu af Líneyju Rut Halldórsdóttur sem lét af störfum fyrr á þessu ári.
Andri er 49 ára íþróttafræðingur með meistaragráðu í íþróttastjórnun og hefur starfað hjá ÍSÍ síðan 2002, fyrst sem sviðsstjóri Fræðslu og útbreiðslusviðs ÍSÍ og síðar sem sviðsstjóri Afreks- og Ólympíusviðs ÍSÍ og sem staðgengill framkvæmdastjóra.
Hann hefur mikla reynslu og þekkingu á starfi íþróttahreyfingarinnar, jafnt innanlands sem erlendis, en hann hefur meðal annars verið aðalfararstjóri á Ólympíuleikum síðan 2008 og á nú sæti í Tækninefnd Smáþjóðaleika Evrópu fyrir hönd ÍSÍ.
Framkvæmdastjórn ÍSÍ samþykkti einróma að ráða Andra í starfið.
Umsækjendur voru alls 29 talsins og var ráðningarferlið í umsjá Hagvangs.
Þess má geta að unnið er að skipulagsbreytingum á skrifstofu ÍSÍ sem vonandi leiða til þess að ÍSÍ geti enn frekar bætt þjónustu við sambandsaðila sína á nýju ári.
Með bestu kveðju,
ÍÞRÓTTA- OG ÓLYMPÍUSAMBAND ÍSLANDS
Lárus L. Blöndal
forseti
